美團點評強勢！

前日美團點評路到91蚊，係果日入左一張95既12月認賺期權。果晚美團公布業績，遠超預期。

琴日美團開市係101蚊，最高升到103蚊。收市路番去98蚊。

我係大約102蚊賣左張期權，一張賺到大約千五蚊。好和味！大約有75%利潤。

其實我要全力去學期權。

無論恒指定股票期權都係。

牛熊盡量唔好再買賣。

如果係咁，富途果一千蚊輸哂就算了。唔好再入錢落去，反而致富期權要入錢去買賣。

11， 12， 1月都唔再入錢去投資

之前睇八字，個師傳話我依三個投資都比較差。

咁樣我下月開始唔再入錢去投資買賣股票，渣番而家一早買定既野，新錢唔入住。儲下先。

今個月用多左錢，要停一停！

貪勝不知輸

話說琴日上午無時間睇市，個市先升到26950，殺左大量熊。

到我睇到市已經升到尾聲，果陣入左牛，點知個市就唔升，止蝕走人，再轉熊，賺到二百幾蚊，再反手，又輸番，最後琴日賺果幾百蚊輸番哂！

牛熊就係咁，唔中大方向，就多數輸，好難玩！

不過唔好灰心，再黎過。

用緊咩技術指標？

記低下我而家用緊咩技術指標先。

首先我會睇一分鐘陰陽燭，睇下買賣力度。
然後再睇平均線，搵支持阻力，不過幾多天平均線未總結到。
再之後睇MACD，睇向牛定向熊。
最後先睇RSI。

暫時依幾日都係用依幾個指標。

估唔到無大升！

琴日隻過夜牛賺到六百幾蚊。仲以為賺到幾千蚊！

因為前晚美期大爆升，但係港股無反應，升得果幾十點。跟住我唔敢渣，幾百蚊都要。平左隻牛之後，隻牛最高升到0.074，都有成千幾蚊。不過我唔會食到架啦。

然後等機會反手左一下，買熊賺左一日蚊。最後隻熊死埋！

真係好難玩同好攰，因為你係被動咁等個升或跌，個秒都諗緊走唔走好。一旦有人嘈你，睇唔到個市就大鑊！

總結琴日，都賺到過五百蚊，我已滿足了！

其實日日係咁，拎多啲經驗，我好快可財務自由！

啲資金分配要再計劃

話說今個月我將本來用黎儲既三千入左落去致富股票期權，變相我只儲左一千蚊去渣打，六千蚊去期票期權。

非常唔好彩，股票期權我輸左三千蚊。一路都追唔到數。

而家個分配係咁：一千儲，一千五百去富途買牛熊，三千去股票期權。

股票期權我主要做short食時間值，唔再做long啦。
富途牛暫時依個無輸，個本拎番出黎。，我諗千五蚊夠。
渣打儲錢要諗下，一千會唔會太小？

不過又咁，如果我儲三千，然後走去買啲垃圾股，最後都係輸，又係無意思。

我諗下個月都係咁樣做住先，睇下有無問題。

買左牛證過夜！

今日大悶市，上午叫做有啲波幅，但係都好細。下午就更誇張，直頭係度磨，磨到收市。

果陣都十五十六，平唔平倉好呢？

最後決定牛證過夜。

原因有：見到MACD仲係牛市，啲技術線仲係向好未轉勢，同埋26900-27000有極大量熊證。

而家美期都大升中，希望聽日港股都升到三四百點，去到27000啦。

到時我就拎賺到既錢買gopro！

中電Short Put早左走

話說依個月我入番錢落去致富股票期權戶口。

開頭做金沙既LONG CALL, 賺到幾百蚊。 然後再做中電80蚊Short put，諗住賺佢700蚊既期權金。
可惜前幾日中電跌穿80蚊，我太驚，最後平左張Short put。
去到今日，中電升番上80.8, 即係我果700蚊其實仲係袋袋平安！

平左Short put之後，我買左石藥LC，今日損手平倉，再輸多二千蚊。
即係前後我輸左三千蚊。
好難玩！

我諗我要集中玩番金沙，睇下可唔可以賺番輸果啲。

其實而家我對操期權盤既技巧係熟左，希望之後會繼賺到錢！

好耐無更新，記底啲野先！

2017-2019年間，輸多過贏。亦因為咁，令到我自己更加有動力去學股票。

係台灣書店買左好多本講技術分析既書，可是依類書都十分難明，同埋好難應用係港股上。所以依兩年間所進步既知識都唔多。只能靠自己不斷嘗試，不斷反省，睇下搵唔搵到方法。

而家我所用既策略係，大筆既錢主力買落高息股，股息率要高過6厘。其次係將自己既積蓄，買係啲路到好殘既股，不過依個方法有風險，因為跌到好殘，所以唔知幾時會反彈。依隻積蓄我唔會再加注落去，因為唔想溝貨。第三係每個月人工抽部份出黎投資。

而家每月抽出黎既人工有三千蚊去渣打銀做儲錢既。亦有千幾蚊轉去富途同埋致富既投機戶口。

暫時我既策略係咁。

至於富途炒即日先牛熊證，暫時都搵到錢，講真一日賺到三百蚊我已好滿足了！