有新睇法

最近依兩日都有賺到錢，大約賺左一萬蚊到，期間又輸左幾千蚊，我諗住將餘下既錢全部拎出黎用左佢。而家渣得只有一萬八千元，所有錢用來持有1250八萬股。現在1250無有突破既升幅，看看三月尾公佈業績後會否有大升。如果無升的話我再作決定，這一萬八千元是我渣打的股票本。

其實我之前太意氣用事，將大部份積蓄用來炒高風險股，如果賺會很多，可惜沒有。現在戶口已沒有太多錢。期權那邊更慘，輸到只餘五百元。那個時侯時我炒股中最慘痛的時段，全因為意氣用事，買了太大注。現在計劃每月轉小小錢到期權那邊重出江湖，再賺過！

這幾天我炒牛證有大賺，炒熊證就小輸。我再三思考，對牛熊和期權有新看法。首先牛熊和期權是兩種不同工具，不能互相取代。牛熊估的是回收價而期權估的是行使價，兩者都是估，但是所投入的資金卻有分別。牛熊如果買近回收價的，所需的資金極小，壞處是很易被屠。而期權如果買近行使價的話，期權金會很貴。首先在成本上已有明顯的分別。另外期權的時間可以持有一個月，而牛熊很多都是半年有較期，時間值上沒太大意義，因為很多時都是短炒一兩天，所以對時間值不會敏感。

了解了兩者的分別後，我的看法是，絕對不要預先買定牛熊或期權去等大市升或跌，因為一旦大市行反方向或橫行，跟本無利可圖甚至會蝕時間值。所以第一件事是要等，等大市有方向，如果看大市有沒有行單邊就是關鍵所在。這需要技術分析。

然後，假如你看得清大市將會行單邊的時候，買牛熊獲利是比期權容易。因為第一你不會知道大市會升到那個位，大市每天都在變化，如果買期權近行使價的話，想每點一百元就要兩張，分分鐘所投入的資金要萬多元，假如你入市後大市明天是行反方向，那你的期權金將會蝕非常多！但是如果你是買近價牛熊，想每點一百元就要買十萬股，所投入的資金是二三千元。相對的如果大市是行自己買的方向，那麼牛熊和期權都會賺，這時可能期權會賺多少少，但係期權也有闊價的時候，而且對期指變化非常敏感，和牛熊差不多。

如果買啱方向，那牛熊最多持一兩天，然後再轉下一隻近牛熊這樣轉來轉去，佣金成本會比期權低。那結論是其麼呢？我在想，假設期權戶口和證劵戶口都有錢的情況下，通常牛熊證是見到大市有方向才會買，因為會被屠所以很小會在無方向就買定，反而期權很多時會買定來等大市行。如果這樣，首先都是要等時機，有明顯方向時就買近牛熊，不要估升到那，另外同時入期權，要估升到哪。然後一兩日後牛熊就要平倉獲利，再轉下一隻近牛熊，而期權則要繼續持有直到入行使價。這是我的新看法！

信心？

今個月又輸，已經輸到無哂本，而家要每個月儲番一千月去買期權。其實我今個升浪，我無信心揸住，又一次錯失回本機會。而家問題又再一次出現，究竟係要長揸食浪定係短炒即食呢？

依兩種情況我都經歷過，長揸住食唔到浪，原因係個市横行，根本無機會俾你食浪。而如果你短炒，俾你賺到小小錢之後，你又入番反方向，因為果陣你又睇緊橫行，但係大市行浪你隨時輸番賺左果小小。

歸納出黎既結果：要識睇圖評估入市時機，即當時應該入升定係跌。第二係博佢行浪定橫行。

如果照計，食浪可以致富既機會大過短炒食橫行市。是否每一次入市都以食浪為主呢？每次炒一個月市。總有一次食中浪，咁就可以回本。

如果當賭錢咁計，每個月用五千蚊，月頭買期權金大約50點既，買兩張，每一格一百元。如果期權金去到二百，即賺一百五點，果度係一萬五千元，係三倍利潤。每月五千蚊，一年六萬元。咁樣買值唔值呢？如果有啲月份擺明係橫行市，咁可以避免唔入市。想一想有無可能咁樣做先。。。

時機

今日平左好倉，終算獲左小小利。然後有感而發，覺得要搵番之前既感覺先可以唔輸。

其實上個月都有一次睇啱市，然後早左平倉，獲利後再買反方向，最終變左倒輸收場。而今次既獲微利都係先輸後贏，正正係因為先輸所以反映左我買入既時機錯左。如果我遲啲先買，咁樣獲利既金額係會多一倍。而平倉後先作離場，亦都係可以避免再輸番之先贏既。

我記得係我第二水係羅湖做既時侯，有一段時間可以長勝，而且賺得唔小錢，係一日可以超過五千元利瀾，當時既手風係好順。果陣係炒好短，好多時係炒即市。

以下係總結一下今後既入市時機：
1) 要有睇即市圖既技巧，如果即市係悶市既，都唔好諗住之後會行大浪。行大浪之前應該係有一棍強勁既買賣盤去推動。如果炒到即市係最好，因為風險低。
2) 平倉其實都係睇即市，買入賣出都要有根據，一旦做左自己訂下既選擇之後，就唔好即市再追入。諗番好似無一次係可以補追入之後賺到既，次次都係輸番走。
3) 牛熊證最後都係要係渣打買，因為佣金平係大哂，加上佢可以設下止蝕價。東亞唔可以設止蝕價同佣金貴，今後唔可以再用東亞買牛熊證。而致富可以設止蝕價，但係佣金都唔平。所以最後結論係要用渣打買賣牛熊證。
4) 唔可以先買定某個方向既長倉。第一，長倉行使價好難決定，買近既行使價好貴，而買遠既行使又好難達標，最終輸時間值。唔只一次再現既一個情況就係個市先橫行，所有既長倉期權金都蝕緊，然後個市再向某個方向行，如果係發現大市開始行既時候先入長倉，能夠賺到錢既機會係大過一早買定長倉既機會。

就今日既24000LC而言，我入既時候係72，最低見過34，今日最高係約100。我唔係100既時候平倉，好似係80平，雖然賺小左好多，但有賺好過輸。照依個情況，我根本係有條件係72以下買長倉，但係因為我一早就買定左，個市未向我個方向行之前就先跌，如果我係佢跌既時候先買，今日係賺到一倍。依個就係買入時機既重點。今後要留意，忍手！

同埋再一次講，平左之後決不可即時再入，倒輸既機會係超過九成。平左倉就要等時間，寧願賺唔到都唔可以倒輸。要克服心魔！